Tuesday, June 28, 2016

Pudhina rice

புதினா சாதம் 


தேவை :

  • புதினா - 1 கட்டு 
  • பச்சை மிளகாய் - 2 - 3
  • ஸ்வீட் கார்ன் - 2 -3 teaspoon 
  • உருளைக் கிழங்கு - 1 (வேக வைத்தது )
  • பட்டை, லவங்கம் - தலா 1
  • பெரிய வெங்காயம் - 1
  • நெய் - 1 tablespoon 
  • முந்திரி - தேவைக்கு 
  • சீரக சம்பா அரிசி - 1 கப் 
  • காரட் -1

செய்முறை :

  1. சீரக சம்பா அரிசியை 15-20 நிமிடம் ஊற வைக்கவும். புதினாவை சுத்தம் செய்து பச்சை மிளகாயுடன் சேர்த்து அரைத்துக் கொள்ளவும்.
  2. ஸ்வீட் கார்னை உதிர்த்து தனியாக வைத்துக் கொள்ளவும். வாணலியை அடுப்பில் வைத்து நெய் விடவும்.
  3. காய்ந்ததும் பட்டை, லவங்கம் தாளிக்கவும். பிறகு அரிந்த வெங்காயத்தை சேர்க்கவும். வெங்காயம் வதங்கியவுடன் வேக வைத்த உருளைக் கிழங்கு , கார்ன் முத்துக்கள் சேர்த்து வதக்கவும்.
  4. சிறிது வதங்கியவுடன் ஊற வைத்த அரிசியை சேர்த்து வதக்கவும். அரிசி சிறிது வதங்கியவுடன் 1 கப் அரிசிக்கு 1 1/2 கப் தண்ணீர்( புதினா அரைத்த கலவையும் சேர்த்து 1 1/2 கப் இருக்க வேண்டும்)சேர்க்கவும்.
  5. தண்ணீர் கொதித்ததும் குக்கரை மூடவும். ஒரு விசில் வந்ததும் அடுப்பை சிம்மில் வைக்கவும். 5 நிமிடங்கள் கழித்து அடுப்பை அணைக்கவும்.
  6. பரிமாறுவதற்கு முன் நெய்யில் வறுத்த முந்திரி சேர்த்து பரிமாறவும். தயிர் பச்சடியுடன் சேர்த்து சாப்பிட சுவையாக இருக்கும்.

தயிர் பச்சடி செய்ய :

புளிப்பில்லாத தயிருடன் உப்பு சேர்த்து  நன்றாக கடைந்து  கொள்ளவும். பிறகு துருவிய கேரட், சிறிதாக நறுக்கிய வெள்ளரிக்காய், நறுக்கிய வெங்காயம் சேர்க்கவும். தேவைப்பட்டால் நறுக்கிய தக்காளி , நறுக்கிய பச்சை மிளகாய் சேர்க்கவும். பரிமாறுவதற்கு முன் நறுக்கிய கொத்தமல்லி போட்டு பரிமாறவும்.சுவையான பச்சடி தயார்.






 

Tips #48 : பயத்தம் பருப்பு சுண்டல் உதிரியாக வர !!

பயத்தம் பருப்பு சுண்டல் உதிரியாக இருக்க பருப்பை வறுத்து விட்டு வேக வைத்தால் நன்றாக இருக்கும்


Sunday, May 29, 2016

Cauliflower paratha


குழந்தைகள் அனைவருக்கும் கோடை விடுமுறை முடிய இன்னும் சில தினங்களே உள்ளன. பள்ளிகள் திறந்தவுடன் அம்மாக்கள் அனைவருக்கும் என்ன காலை, மதிய உணவு கொடுப்பது என்று குழப்பம் ஆரம்பித்து விடும்.டேஸ்டி, ஆரோக்கியமாக  இருப்பது மிக அவசியம்.

இதோ உங்களுக்காக சில உணவு வகைகள். செய்து அசத்துங்கள் தோழிகளே.குழந்தைகள் விரும்பி உண்பர்.

காலிப்ளவர் பராத்தா 


தேவை :

  • சிறிய காலிப்ளவர் - 1
  • பச்சை மிளகாய் - தேவைக்கு 
  • சீரகம் - 1 teaspoon 
  • உப்பு - தேவைக்கு 
  • நெய் - தேவைக்கு 
  • கோதுமை மாவு - 1 கப் 
  • தயிர் - 1- 2 teaspoon 
  • கொத்தமல்லி - தேவைக்கு 

செய்முறை :

பூரணம் தயார் செய்ய :

  1. காலிப்ளவரை சிறிய பூக்களாகப்  பிரித்தெடுக்கவும். சுடு தண்ணீரில் உப்பு, மஞ்சள் தூள் கலந்து பூக்களை அதில் போட்டு சில நிமிடங்களில் எடுத்து விடவும்.
  2. காரட் துருவுவது போல் பூக்கள் ஒவ்வொன்றாக துருவி வைத்துக் கொள்ளவும். அதிக நேரம் சுடு தண்ணீரில் பூக்களை வைத்திருந்தால் குழைந்து விடும்.துருவுவது கடினம்.
  3. கடாயை அடுப்பில் வைத்து சிறிது நெய் விட்டு காய்ந்தவுடன் சீரகம் போட்டு தாளிக்கவும். பிறகு பச்சை மிளகாய் போட்டு வதக்கவும்.
  4. கடைசியாக துருமிய பூக்களைப் போட்டு வதக்கவும். சிறிது வதங்கியவுடன் உப்பு, கொத்தமல்லி தழைகளை கலந்து இறக்கவும். பூரணம் ரெடி.

பராத்தா மாவு செய்ய :

  1. கோதுமை மாவுடன் உப்பு சேர்த்து நன்றாக கலந்து கொள்ளவும். பிறகு தயிர் சேர்க்கவும். நன்றாக மாவுடன் கலக்கவும்.
  2. பிறகு சிறிது சிறிதாக தண்ணீர் சேர்த்து மாவை பிசைந்து கொள்ளவும். 1/2 மணி நேரம் ஈரத் துணியால் மூடி வைக்கவும்.
  3. மாவில் சிறிய உருண்டை எடுத்துக் கொள்ளவும். மாவை குழி போல் செய்து கொண்டு அதனுள் காலிப்ளவர் பூரணத்தை வைத்து மூடவும்.
  4. பிறகு சப்பாத்தி தேய்ப்பது போல் தேய்க்கவும். பூரணம் வெளியில் வரக் கூடாது. தவாவை அடுப்பில் வைத்து சப்பாத்தி சுட்டு எடுக்கவும்.
  5. இரண்டு பக்கமும் நெய் விட்டு சுட்டு எடுக்கவும். தயிர் பச்சடியுடன் பரிமாறவும். குழந்தைகளுக்கு மிகவும் பிடித்தமான பராத்தா ரெடி.




Tip #47 : இரும்பு வாணலி / தோசைக்கல் பிசுக்கு போக !!!

உப்புக் காகிதம் கொண்டு பிசுக்கு பிடித்த பகுதியின் மேல் தேய்த்தால் அவை உதிர்ந்து விடும்.கெட்டியான பிசுக்காக இருந்தால் தோசைக்கல்லை சூடாக்கி ஒரு கத்தியால் சுரண்டி விட்டு பிறகு உப்புக் காகிதத்தால் தேய்க்கவும்.


Tuesday, May 10, 2016

Moong dal halwa

பாசிப்பருப்பு அல்வா 

 

தேவை :

  • பாசிப் பருப்பு - 1 கப் 
  • சர்க்கரை - 1 கப் 
  • நெய் - 1/2 கப் 
  • வறுத்த முந்திரி, திராட்சை - தேவைக்கு 
  • கோதுமை மாவு - 1 tablespoon 
  • ஏலத்தூள் - 1 teaspoon 

செய்முறை :

  1. பாசிப் பருப்பை லேசாக வாசனை வரும் வரை வறுக்கவும். பிறகு தேவையான தண்ணீர் விட்டு குக்கரில் 3-4 விசில் வரும் வரை வேக விடவும்.
  2. பிறகு குக்கரைத் திறந்து பருப்பை மத்தால் மசிக்கவும்.சிறிது சிறிதாக  சர்க்கரை சேர்க்கவும். அடுப்பை சிம்மில் வைத்துக் கொண்டு கை விடாமல் கிளறவும்.
  3. கோதுமை மாவை வாசனை வரும் வரை வறுத்து பாசிப் பருப்புடன் சேர்க்கவும். சிறிது சிறிதாக நெய்யையும் சேர்க்கவும்.
  4. பாத்திரத்தில் ஒட்டாமல் வரும் வரை கிளறி இறக்கவும். இறக்குவதற்கு முன்  வறுத்த முந்திரி, திராட்சை, ஏலத்தூள் சேர்க்கவும்.
 
 
 
 
 
 
 

Tip #46 : பட்சணங்கள் சிவக்காமல் இருக்க !!!

மிஷினில் மாவு அரைத்தவுடன் சூடு ஆறும் வரை வைத்திருந்து பிறகு மூடி வைக்கவும். சூட்டோடு மூடி வைத்த மாவில் பட்சணங்கள் செய்தால் சிவந்து விடும்.
 
 

Wheat flour pakoda

கோதுமை மாவு பகோடா

பகோடா அனைவருக்கும் பிடித்தமான ஸ்நாக்ஸ். கடலை மாவில் பகோடா செய்யும் போது வாயுக் கோளாறுகள் ஏற்படும். ஒரு சிலருக்கு  கடலை மாவினால் அலர்ஜி ஏற்படுவதுண்டு. என் தோழியின் அம்மா கோதுமை மாவில் பகோடா செய்து கொடுத்தார்கள். மிகவும் ருசியாக இருந்தது. அதை அனைவரிடமும் பகிர ஆசைப் படுகின்றேன். ( கோதுமை மாவிற்குப் பதிலாக மைதா மாவு உபயோகிக்கலாம். )
 
 

தேவை : 

  • கோதுமை மாவு - 1 கப் 
  • சமையல் சோடா - 1 சிட்டிகை 
  • பச்சை மிளகாய் - தேவைக்கு 
  • சீரகம் - 1 teaspoon 
  • பெருங்காயம் - சிறிது 
  • சிறிதாக நறுக்கிய வெங்காயம் - 2 (பெரிய வெங்காயம் )
  • தேங்காய் பல் சிறிதாக நறுக்கியது - 2-3 teaspoon (விருப்பப்பட்டால் அதிகமாக சேர்க்கலாம் )
  • உப்பு - தேவைக்கு 
  • எண்ணெய் - பொரிக்கத் தேவையான அளவு 
  • கறிவேப்பிலை, கொத்தமல்லி நறுக்கியது - சிறிது 

செய்முறை :

  1. கோதுமை மாவை நன்றாக சலித்துக் கொள்ளவும். மாவுடன் எண்ணெய் தவிர அனைத்துப் பொருட்களையும் கலக்கவும்.
  2. பிறகு சிறிது சிறிதாக தண்ணீர் சேர்க்கவும்.பகோடா போடும் பதம் வந்ததும் தண்ணீர் சேர்ப்பதை நிறுத்தவும்.
  3. வாணலியில் எண்ணெய் ஊற்றி சூடானதும் மாவை சிறிது சிறிதாக கிள்ளிப் போடவும். சிவந்து வந்ததும் எடுத்து விடவும்.
  4. சுவையான, ஆரோக்கியமான ஸ்நாக்ஸ்  ரெடி. தக்காளி சாஸுடன் சாப்பிட சுவையாக இருக்கும்.
 
 
 
 
 

 

Tip #45 : பாத்திரங்கள் வாடை இல்லாமல் இருக்க !!!

அசைவம் அல்லது பூண்டு அதிகம் சேர்த்து சமைக்கும் போது பாத்திரங்கள் கழுவிய பிறகும் வாடை இருக்கும். பாத்திரங்களை கழுவிய பிறகு எலுமிச்சை சாறு கலந்த தண்ணீரால் கழுவினால் வாடை இல்லாமல் இருக்கும்.

 
 

Monday, May 9, 2016

Jackfruit ice cream

கோடைகாலம் ஆரம்பித்து விட்டது. குழந்தைகளுக்கு விடுமுறையும் விட்டாச்சு. குழந்தைகளுக்கு தினம் ஆரோக்கியமான உணவுகள் செய்து கொடுப்பதில் அம்மாக்கள் பிஸியாக இருப்பார்கள். கோடைகாலம் என்றாலே நமக்கு நினைவில் வருவது ஐஸ்கிரீம். ஐஸ்கிரீமை  நாமே நம் குழந்தைகளுக்கு செய்து கொடுத்தால் ஆரோக்கியமாகவும், மகிழ்ச்சியாகவும் இருக்கும். எளிதாகக் கிடைக்கும் பொருட்களை வைத்து என் தோழி எனக்கு கற்றுக் கொடுத்தது இதோ உங்களுக்காக .

 

பலாப்பழ ஐஸ்கிரீம் 

 

தேவை :

  • பலாச்சுளை - 6
  • சர்க்கரை - 1 கப் 
  • பால் - 1 கப் 
  • பால் பவுடர் - 1 கப் 
  • வெணிலா எசன்ஸ் - 1 spoon 
  • முந்திரி - 5
  • ஏலத்தூள் - 1/4 spoon 

செய்முறை :

  1. பால் பவுடரில் பால் விட்டு கெட்டியாகக் கரைத்துக் கொள்ளவும். பலாச்சுளையை பால் விட்டு அரைக்கவும்.
  2. பாலில் சர்க்கரை போட்டுக் காய்ச்சிக் குறுக்கவும். எல்லாவற்றையும் கலந்து எசன்ஸ் கலந்து மிக்ஸியில் அடித்து ஒரு பௌலில் போட்டு ப்ரீசரில் வைக்கவும்.பாலுக்கு பதிலாக கோவா செய்தும் கலக்கலாம்.
  3. 2 மணி நேரம் கழித்து வெளியில் எடுத்து மறுபடி மிக்ஸியில் அடித்து மிருதுவாக்கவும். பிறகு ப்ரீசரில் வைக்கவும்.
  4. இது போல் 2 முறை செய்தால் ஐஸ்கிரீம் மிக மிருதுவாக இருக்கும். கஸ்டர்ட் பவுடர் கரைத்து கொதிக்கவிட்டோ, கோவா சேர்த்தோ செய்தால் மிகவும் ருசியாக இருக்கும்.
  5. அலங்கரிக்க நெய் விடாது வருத்த முந்திரி, ஏலம் சேர்க்கவும். சுவையான சத்தான ஐஸ்கிரீம் ரெடி.
 
 
 
 
 
 
 
 

Tip #44: இட்லி மிருதுவாக இருக்க !!!

இட்லிக்கு அரைக்கும் போது உளுந்தில் ஐஸ் வாட்டர் ஊற்றி அரைத்தால் இட்லி மிருதுவாக இருக்கும்.

 
 

Saturday, May 7, 2016

Bread bajji

பிரெட் பஜ்ஜி 

 
 

தேவை :

  • பச்சைப் பட்டாணி - 1/4 கப் 
  • மீல் மேக்கர் - 10
  • உருளைக் கிழங்கு - 2
  • பிரெட் துண்டுகள் - 3
  • கடலை மாவு - 1 கப் 
  • பெரிய வெங்காயம் - 1
  • பச்சை மிளகாய் - 2
  • மிளகாய்த் தூள் - 2 டீஸ்பூன் 
  • மஞ்சள் தூள் - 2 டீஸ்பூன் 
  • சமையல் சோடா - 1சிட்டிகை 
  • மல்லித்தழை - பொடியாக நறுக்கியது தேவைக்கு 
  • எண்ணெய், உப்பு - தேவைக்கு 
  • எலுமிச்சைச் சாறு - 1 டீஸ்பூன் 
  • சீரகம் - 1 டீஸ்பூன் 

செய்முறை :

  1. மீல் மேக்கரை கொதி நீரில் 5 நிமிடம் போட்டு வைத்திருந்து, பிறகு நீரை வடித்து குளிர்ந்த நீரில் அலசவும்.
  2. நீரை ஓட்டப் பிழிந்து மிக்ஸியில் போட்டு ஒன்றிரண்டாக உதிர்த்துக் கொள்ளவும்.
  3. உருளைக்கிழங்கு, பச்சைப் பட்டாணியை வேக வைத்து மசித்துக் கொள்ளவும்.
  4. வாணலியில்  எண்ணெய் விட்டு காய்ந்ததும் வெங்காயம், பச்சை மிளகாய் சேர்த்து வதக்கவும். பிறகு மிளகாய்த் தூள், மஞ்சள் தூள், உப்பு, எலுமிச்சைச் சாறு, சேர்த்து வதக்கவும்.
  5. இதனுடன் மசித்த உருளைக்கிழங்கு, பட்டாணி, மல்லித்தழை, உதிர்த்த மீல் மேக்கர் போட்டு கிளறி இறக்கவும்.
  6. கடலை மாவில் ஒரு சிட்டிகை சமையல் சோடா, சிறிது மிளகாய்த் தூள், தேவைக்கு உப்பு, சீரகம் சேர்த்துக் கரைத்துக் கொள்ளவும்.
  7. ஒரு பிரெட் துண்டை எடுத்து அதன் மேல் இக் கலவையை வைத்து இரண்டாக மடித்துக் கொள்ளவும்.
  8. சூடான எண்ணெயில் பொரித்தெடுக்கவும்.தக்காளி சாஸுடன் பரிமாற சுவை அள்ளும்.
 
 
 
 
 
 

 

Tip #43 : வாழைப்பூ ஆயும்போது பிசுக்கு ஓட்டுவதைத் தவிர்க்க !!!

கையில் உப்பைத் தடவிக் கொண்டு ஆய்ந்தால் பிசுக்கு ஒட்டாது.

 

Friday, May 6, 2016

Veg gravy

வெஜ் கிரேவி 

 

தேவை :

  • பீன்ஸ் - 50 gm 
  • காரட் - 50 gm 
  • பட்டாணி - 50 gm 
  • காலிபிளவர் - 50 gm 
  • குடை மிளகாய் - 50 gm 
  • உருளை - 2
  • வெங்காயம் - 1/4 kilo ( உரித்தது )
  • தக்காளி - 1/4 kilo (நறுக்கியது )
  • மிளகாய்த் தூள், தனியாத் தூள், சீரகத் தூள், மஞ்சள் தூள் - தலா 1 teaspoon 
  • இஞ்சி, பூண்டு விழுது - 1 teaspoon 
  • கரம் மசாலா - சிறிது
  • வெண்ணெய், எண்ணெய் - சிறிது
  • முந்திரி பருப்பு விழுது - தேவைக்கு 
  • உப்பு - தேவைக்கு 

செய்முறை :

  1. காய்களை சிறியதாக நறுக்கி வேக வைத்துக் கொள்ளவும். எண்ணெயை வாணலியில் ஊற்றி காய்ந்ததும் கரம் மசாலா சேர்த்து தாளிக்கவும்.
  2. பிறகு வெங்காயம் சேர்த்து பொன்னிறமாகும் வரை வதக்கவும். வதங்கியவுடன் இஞ்சி, பூண்டு விழுது, தக்காளி சேர்த்து 10 நிமிடம் வதக்கவும்.
  3. மஞ்சள் தூள், தனியா, சீரகத்தூள், மிளகாய்த் தூள் சேர்த்து வதக்கவும். பிறகு முந்திரி விழுது சேர்க்கவும்.
  4. இப்பொழுது வெந்த காய்களைச் சேர்த்து நன்கு கலக்கவும். பிறகு வெண்ணெய் சேர்க்கவும்.
  5. இந்த கிரேவி சப்பாத்தி, பூரி போன்றவற்றிற்கு மிக நன்றாக இருக்கும்.
 
 
 
 

 

 

Tip #42 : மருதாணி நன்றாகச் சிவக்க !!!

கைகளில் மருதாணி வைத்துக் கொள்வதற்கு முன் எலுமிச்சம் பழச் சாற்றை தடவிக் கொண்டு மருதாணியை வைத்துக் கொண்டால் மிக நன்றாகச் சிவக்கும்.